Home Articles <<  
Worldknowledge1
 
 
 
 
 
MQM was founded in 1978 it was generally known as Muhajir Quami Movement which was represented the (Muhajir) mean those people who migrated during the Independence. After a few year it was converted into Muttahida Qaumi Movement in 1984.MQM is 2nd Largest political party in Sindh. Altaf hussain was the founder of MQM. In this page you will find and read MQM History in Urdu Hindi Roman.

History Of MQM
Muttahida Qaumi Movement

 

Foundation Of Muttahida Qaumi Movement

Karachi aur andurone sindh mein APMSO ka kam teezi se pheel raha tha jo kal tak apne apko Muhajir kehte hoye sharmate they aaj wo Muhajir hone par fakhar karahey they. Karachi aur andurone sindh ki duro deewar par lafaz Muhajir likha hoa nazar aane laga tha. Awaam josh wa kharosh ke sath APMSO mein shamoliyat ikhtiyaar karahey they lekin kuch tabko mein ye bat kahi jane lagi ke APMSO to talba tanzeem hai ilaaqo mein rehne wale marad, khawateen aur buzurg kis hesiyat mein iss talba tanzeem mein kaam karain. Lehaza 18 March 1984 ko Quaid-E-Tehreeq aur tamam sathiyo ke bahemi mashware se mulki satah par tanzeem ka kayam amal mein aya jis ka naam Mohajir qaumi movement(MQM) rakha gaya, MQM ke kayam ke fori baad awaam ki bohut bari tadad jok dar jok MQM mein shamil hone lagi jab-ke APMSO ko sirf taleemi adaro mein kaam karne ke liye makhsus kar diya gaya chun-ke APMSO ke plate form se Muhajir paigham Karachi se nikal kar sindh ke dosare shehro aur kasbo mein bhi pheel chukka tha haydrabad, tando jam, tandowala yaar, nawab shah aur meer pur khass mein Muhajiro ki ek bari tadad APMSO ke plate form par jama ho chuki thi lehaza MQM ke kayam ke sath hi logo mein ek josh wal wala paida hogaya aur logo ne MQM mein shamuliyat ikhtiyaar karna shuro kardi. Kisi talba tanzeem ki batan se siyaasi jamait ka paida hona Pakistan ki siyaasi tareekh ka ek naya baab tha. Siyaasi wa mazhabi jamaitain apne kayam ke baad apni talba tanzeemain kaim karti aur inn talba tanzeemo ko apne maqsad ke liye istamal karti thein magar ye Pakistan ki tareekh ka pehla aur anokha wakaye hai ke kisi talba tanzeem ke batan se kisi awaami tehreeq ne janum liya. Quaid-E-Tehreeq ki fiqar nashisto aur khitabaat ne awam ki soch ko ek naya rukh diya jo log apne haqok se na ashna they wo apne haqok ke hasool ke liye MQM ke plate form par jama hone lagey lekin iss ke sath sath mukhtalif siyaasi, mazhabi aur lasani jamaito ne ye propaganda karna shuro kar diya ke janab Altaf Hussain to behari hain aur wo behariyo ko Pakistan wapis lane ke liye tehreeq chala rahey hain. Kabhi inn par shiya hone ka ilzaam lagaya jat. Quaid-E-Tehreeq iss tarha ke be bunyaad propaganda ki parwah kiye bagair tehreeqi kamo mein masroof rahey.

First Office Of MQM

Muhajir qaumi movementke kayam ke ailaan se pehle MQM ki pehli kabina ka ailaan 1983 mein kiya ja chukka tha jis ke mutabiq Azeem Ahmed Tariq chairmen, Saleem Shehzad voice chairmen aur Imran Farooq secratry general ki hesiyat se muntakhib hoye issi tarha digar uhdey daro ka bhi ailaan kiya gaya. Iss waqat ye bat bhi tey paai gai ke party ka office bhi hona chahye jahan tamam sathi aakar rabta karain. Wasail bohut kam they aur amdani ka zarya bhi nahi tha lehaza liaqatabad number 1 mein supper market ke pechey ek makaan ki chahat par ek kamre ka office mil gaya tha jis ke sath ek chota sa keitchen bhi tha magar ye ketchen baraiye naam hi tha jis mein darwaza tak nahi tha yahi haal bathroom ka tha jis mein darwaze ki jaga parda latak raha tha. Lekin humne iss kamre ko saaf kiya aur color kar ke iss kamre ko iss kabil bana diya key waha beth kar kaam karskte they. Humne ketchen mein chay ki pati ke sath ketli aur doodh cheeni bhi rakh li thi. Iss waqat iss kamre ka kiraya 400 rupay tha aur office jane ka rasta gandi gali se tha. Iss zamamne mein Janab Altaf Hussain Boots ki company mein kaam karte they. Aap boots company se farigh ho kar office ajaya karte they. Iss chote se office se tehreeq ke kaam ka aghaaz hoa aur aaj dunya bhar mein MQM ke hazaro office hain. Aaj MQM jis mukaam par mojud hai jo kamyaabiya MQM ne hasil ki hain iss ka sehra sirf aur sirf Janab Altaf Hussain ko jata hai jin ki antahak mehnat aur jedo jehad ki badolat tehreeq iss mukaam par pohchi hai ab dunya bhar mein mutahida Quami Movement ko jana aur pehchana jata hai.

Altaf Hussain Visit To Lahore

25 aur 27 November ko Quaid-E-TEhreeq ne Punjab ke dorey ka aghaz kia. Jab wo Punjab ke shehar Lahore puhchey to Punjab ke awaam ne Quaid-E-Tehreeq ka walehana istaqbaal kiya. 26 November 89 ko Lahore ke mayor ne bagh jinah mein Janab Altaf Hussain ke ezaz mein istaqbalia diya jiss mein Quaid-E-Tehreeq ne pehli martaba Punjab ke muntakhib numaindo aur amaideen shehar se khitaab kiya aur MQM ke fikar wa falsafa par roshani daali.         

23 March 1990 ko Janab Altaf Hussain ne pehli martaba minaare Pakistan mein awaami jalsaa se khitaab kia. Apne khitaab mein unhone stag par mojud siyaasi rehnumao ki janib ishara kartey hoye awaam se kaha ke sone ka chamcha mu mein lekar paida hone wala ap ke masail hal nahi karskta agar aap apne masail hal karna chahtey hain to ap ko apne darmiyaan se taleem yafta aur emaandar kiyadat muntakhib karni hogi. Janab Altaf Hussain ki khitaab ko Punjab ki awaam ne bohut pasand kiya aur unki taraf se mutalba kiya jane laga ke MQM bhi apne office Lahore mein kaim kare. Punjab ki awaam bari tadad mein MQM mein shamil hone ki khuwahish mand.