Home Philosophers <<  
Worldknowledge1
 
 
 
 
 
Augustine of hippo was born in 13 November 354 in roman Africa, most of people known him as Saint Augustine. His father name was Paricius and her mother was Monica. Saint Augustine was died on 28 August 430. In this page you will find and read Saint Augustine biography in Urdu Hindi and Roman Urdu.

Saint Augustine

(Biography)

 

Birth Date : 13 th November 354

Death Date : 28th August 430


Saltanat roma ke zawal ke barson me ent ogistain paida hua. Wo apne dor ka azim tarin mahir alhayat tha. Us ki tehriron ne qaron wasti me esai aqaid or rawaiyon pr ghehre asarat muratab kye. Hanoz un asarat ko mehsos kya ja sakta hai.
354 me ogistain bare sahili qasbe hanu (mojuda nam “anaba” ) e karib 45 miles ki dori pr ek qasba tagasta (jo algeria me waqa hai or “sok ahras” kehlata hai) me paida hua. Us ka bap but parast tha, jabke walida ek katar esai thi. Bachpan me us ka baptasmana karwaya gya.
Balogat ki umar me us ki bepanah zehanat ka izhar hone laga tha. 16 baras ki umar me wo hasol ilm ke lye karthej gya. Wo 19 baras ka tha jab us ne falsafa ke mutala ka faisla kya. Jald hi us ne “mani mat” qabol kar lya jise karib 240 me mani ne qaim kya tha. Nojawan ogistain ko esaiyat me bari qabahaten mehsos huin. Jabke mani mat us ke aqli mayarat pr pura utarta tha tahum agle 9 barson me wo batadrij mani mat se badzan ho gya. Jab us ki umar 29 baras thi wo rom chala aya. Thore hi arsa bad wo shumali itley me melan gya jahan wo im khatabat ka ustad ban gya. Wahan us ki neoplatonism se shanasai hui jo aflatoon ke afkar ki ek tarmim shuda sorat thi. Jise tisri sadi eswi me falatinos ne mutashkil kya tha.
Tab melan ka isqaf sent aembros tha, ogistain ne us ke chand khatab sune. Jinhon ne us pr esaiyat ke chand nafis or naye pehlo wa kye. 32 baras ki umar me us ne esaiyat ikhtayar ki or us jesa mutashkik esaiyat ka ek pur josh hami ban gya. 387 me ogistain ne aembros se apna baptasma karwaya. Us ke foran bad wo apne abai qasbe ‘tagasta’ chala gya.   
391 me ogistain hapo ke isqaf ka mawon kar ban gya. 5 sal bad isqaf ka intaqal hua to ogistain ki umar 42 baras thi. Wo hayo ka naya isqaf ban gya. Baqi tamam zindagi wo usi ohde pr raha.
Agarcha hapo ek aham shehar nahi tha lekin lekin ogistain apni khuda dad zahanat ke bais jald hi kalisa ke aham tarin qaidin me shumar hone laga. Us ke pas saholiyat ki kami thi. Tahum ek satino grapher ki mmawonat se us ne bari tadad me mazhabi tehriren likhwain. Us ke 500 se karb khutbat baqi bache hain, 200 khatot is ke elawa hain.
Us ki kitabon me do sab se zyada aham or asar angez sabit hui. (1) “shehar khuda” (2) “aetarazat” mokhar alzikar kitab khud nosht sawaneh hayat ki fehrist me dunya ki sab se mashor kitab mani jati hai. ye kitab us ne umar ki 4th dehai me tehrir ki.
Simon Bolivar ke mutadid khatot ot khutbat me bari shadomad se mani chain, donation (ek badati masihi firqa) or pelagion (us dor ka ek dosra badati masihi firqa) ke aqaid pr tanqid ki gai hai. pelagion se shadid ikhtalafat ne ogistain ke mazhabi nazaryat ki tashkil me aham kirdar ada kya. Pelagas ek angrez rahib tha jo 400 me rom gya. Wahan us ne mutadid dilchasp alhayati nazaryat bayan kye. Us ne dawa kya k hum ‘bunyadi gunah’ se pak hain or khero shar me intekhab ki mukamal azadi rakhte hain. Parsa tarz mashre or nek amal se har ard nijat hasil kar sakta hai.
Kisi had tak saint augustine ki tehriron ke asar tale pelages ko badati qarar dya kya. Use rom se nikal dya or kalisai haqoq se mehrom kar dya gya. Ogistain ke mutabiq tamam insan adam ki masiyat se dagdar hain. Insan faqat apne nek afal or masai kher se apni nijat hasil karne ke qabil nahi hai. is lye rehmat aezdi zarori hai. aese hi khayalat ka pehle bhi aada kya jata raha tha. Tahum ogistain ne is sabqa bayanat ko barha charha kar bayan kya. Us ki tehriron ne in amor pr kalisa ki hesiyat ko mustehkam banaya.
Ogistain ne likha k khuda ko qabal az waqt ilm hai k kon nijat pae ga or kon us se mehrom rahe ga. Hum se chand ek ki qismat me nijat likh di gai hai. loh taqdir ke is khayal ne bad ke mahirin alhayat bpr ghehre asarat muratab kye. Jese sent thoms aekyanes or jan lalon wagera.
Tahum taqdir ke nazarya se kahin aham ogistain ka “jins” (sex) ke hawale se rawaiya hai. jab wo esaiyat ki janib ragib hua to us ne faisla kya k jins se kinara kashi ikhtayar karna zarori hai (us ne likha k koi dosri she jinsi taluqat se zyada qabile ahtaraz nahi hai). khud saint augustine ke lye use waqatan tark kar dena mushkil sabit hua. Is mozo pr us ne dakhli kawish or nuqta nazar ko us ki kitab “aetarazat” me biltafsil bayan kya gya hai. us ne jo khayalat pesh kye wo us ke giran qadar sakh ke bais dor wasti me jins ke mutaliq amomi rawaiya pr shadid asar andaz hue. Ogistain ki tehriron ne hi abdi gunah or jinsi khawahish ke nazarya ko baham milaya.
Ogistain ki zindagi me hi saltanat roma shatabi se tanzil hone lagi thi. 410 me rom ke shehar ko “alark” ki zere qayadat “wezi gothon” ne teo bala kar dya. Qudrati tor pr rom ke baqya but paraston ne dawa kya k romion ko ye saza apne qadim divtaon se inharaf ke lye esaiyat qabol kar lene ke jurm me mili hai. ogistain ki sab se marof kitab “shehar khuda” ek aetabar se isi ilzam ke khilaf esaiyat ke difa pr mabni hai. tahum kitab me tarikh ka mukamal falsafa bhi mojud hai, jis ne europe me bad me hone wali taraqi pr ghehre asarat qaim kye. Ogistain ne is nuqtae nazar ka parchar kya k saltanat roma kisi bunyadi ahmiyat ki hamil nahi hai, na hi shehar rom or na hi koi dosra zamini shehar.
Jo bat aham hai wo “asmani shehar” ki barho tiri hai. balfaz digar insaniyat ki rohani taraqi. Jabke is taraqi ka pahiya “kalisa” hai (“kalisa se bahir kahin nijat mumkin nahi hai”). is se ye sabit hua k shehanshah chahe wo but parast hon ya esai hon, aham nahi hain. Asal ahmiyat ka hamil pop or kalisa hai.
Agarcha ogistain ne khud kabhi koi hatmi qadam na uthaya. Tahum us ke barahin ki taqat ne logon ko ye natija akhaz karne pr majbor kya k in arzi farma narwaon ko pop ke matehat hona chahye. Dor wasti ke pop ye natija akhaz kar ke khush ho rahe, jabke inhin khayalat ne bad azan kalisa or riyasat ke bich tanazat barpa kye, jin se kai sadion tak europi tarikh aluda rahi.
Ogistain ki tehriron ne unani falsafa ke chand phelon ko dor wasti ke europe me sarayat kar jane ka moka dya. Khas tor pr aflatooniyat ne ogistain ki pukhta fikar ko boht mutasir kya. Or ogistain ke tawast se hi ye masihi falsafa pr asar andaz hui. Ye amar qabile dilchasp hai k ogistain ne qadre mukhtalif alfaz me wahi khayal pesh kya jo Descartes ne bayan kya tha k “main sochta hon is lye main hon”.
Ogistain tarik adwar ke agaz se qabal akhri azim mahir alhayat tha. Us ki tehriron ne kalisa ke aqaid ko qadre kham andaz me hi sahi magar un bunyadi khatot pr istawar kar dya. Jin pr ye az mun wasti ke doran qaim rahe, wo latini kalisa ka ek aham tarin pop tha. Ahal kalisa us ki tehriron ko bare dhayan se mulahiza karte the. Nijat, jins, abdi masiyat or mutadid digar mozoat pr us ke nazaryat nehayat mutasir kun sabit hue. Sent thoms aekewenz, lother or kalon jese protestant mazhabi qaidin pr un tehriron ke asarat khase numaya hain.

76 baras ki umar me saint augustine 430 me hapo me fot hua. Ye wo dor tha jab ek wehshi qom “wendal” ne saltanat roma ko tehas nehas kar ke hapo ka mahasira kar rakha tha. Chand mah bad unhon ne qasbe pr qabza kar ke use jala kar khakstar kar dya. Tahum ogistain ka kutub khana or “kethdral”is tabah kari se mehfoz rahe.