Home T.V Actors And Actresses  
Worldknowledge1
 
 
 
 
 
Sadia Imam a famous name of Pakistan television star. Sadia Imam was born on 1975. her sister Aliya Imam also a comedian and actor, sadia Imam showed her ability in modeling and commercial ads and musical video but Sadia Imam famous in different daramas. In this page you will read and find Sadia Imam interview in Urdu and Hindi.

(Interview Of Sadia Imam)

 
Sadia Imam

Sadia imam ne 1996 me Karachi television ki serial Uljhan se apne career ka agaz kya is se pehle wo Islamabad radio or television se bhi thora boht kaam kar chuki thi. sadia ka career 15 barso pr muhit hai jis me boht se utar charhao bhi aae magar bator adakara us ne jo pehchan banai wo waqt guzarne ne sath sath mazbot hoti chali gai. Us ne chahe kam kaam kya ho ya zyada, tv screen pr in rahi ho ya out magar ek achi performer ke tor pr use hamesha yad rakha jata raha, wo sanjida kirdaron me zyada kamyab rahi hai goh k us ne ek dostcom me bhi kaam kya hai magar use pazirai na mil saki or na hi wo mazahiya kirdaron me mozon nazar aai goh k us ne kai bar change lene ki koshish ki magar wo fitratan ek serias fankara hai or wese hi kirdaron me jachti hai wo in dino bhi kafi masrof nazar aarahi hai, ARY se us ka soap Rani beti raj kare gi, onair hai jis me us ne hasbe mamol rone dhone wala kirdar kya hai is interview me hum ne sadia se ye janne ki koshish ki hai k is ne apne aap ko ek hi jese kirdaron ke lye q makhsos kar lya hai.

Question: sab se pehle to ye janna chahon gi k tum zyada tar rone dhone wale characters hi q karti ho kya aese kirdaron ke lye khud ko mozon samjhti ho ya in me performance ki zyada gujaish nazar ati hai ya phir tumhare directors aese kirdaron me cast karna pasand karte hain?

Sadia: ye thek hai k fitratan sanjida hon or mujhe isi tarha ke characters ache lagte hain magar har artist ki khwahish hoti hai k apne career me change leta rahe or main ne bhi hamesha yahi koshish ki hai. Serious characters me bhi boht se shades hote hain or main hamesha kuch naya karne ki koshish karti hon agar aese kirdaron me zyada nazar ati hon to is ka matlab ye hai k log mujhe inhin characters me pasand karte hain or director bhi mujhe aese hi kirdaron me cast kar ke mutmain hote hain. Sab se aham bat ye hai k mujhe khud bhi aese kirdaron me maza ata hai, ab to yun lagta hai k yahi meri pehchan ban gai hai or mujhe is ko bar karar rakhne ke lye menat karni hai.

Question: goya tum ye kehna chah rahi ho k chun k tumhari pehchan aese kirdaron se hai is lye yahi kirdar karna chahti ho ya phir in me perform karna asan lagta hai?

Sadia: adakari ek mushkil fan hai or use kisi tarha bhi asan nahi kaha ja sakta kagaz pe likhi tehrir ko zindagi dena or kisi khyali kirdar me rang bharna koi asan kaam nahi, ab ye kirdar khwah serious ho ya comedy, dono soraton me mushkil hai. Han ye bat zaror hai k koi bhi fankar musalsal ek hi noiyat ke character karte karte us mijaz me dhal jata hai or phir is ke lye wo ek rotin ka kaam hota hai use us me koi dikkat mehsos nahi hoti lekin phir bhi kisi kirdar ko takhlik karna asan nahi hota or jahan tak pehchan ki bat hai kisi khas kirdar me apni pehchan banane ka credit bhi artist ko jata hai wo apni performance se kisi kirdar ko zindagi deta hai use haqiqi rang ata karta hai tabhi logon me use nam or pehchan milti hai.

Question: tum ne ibtada hi aese kirdaron se ki ya bad me soch samjh kar ye image banaya?

Sadia: main ne shuro shuro me mukhtalif noiyat ke roles kye in me shokh or comedy characters bhi the magar rafta rafta mujhe serious kirdar zyada milne lage or isi me logon ne mujhe pasand kya tab hi main ne is pr zyada tawaja di. Karachi se pehli serial uljhan me mera kirdar ibtada me boht shokh or laobali tha magar bad me serious ho gya us character me boht se shades the or mujhe is serial ka acha response mila yahin se meri kamyabi ka safar shuro hua main ne is kamyab serial me koi rone dhone wala kirdar nahi kya tha bal k apne co stars ko rulaya tha q k mera kirdar thora boht negative bhi tha is lehaz se agar dekha jae to main ne shuro shuro me har tarha ke characters kye lekin ab kuch arse se zyada tar serious characters kar rahi hon.

Question: tum ne negative character bhi kye hain unhen karte hue kesa laga or is ka kya response mila?

Sadia: mujhe negative character ache lage in me performance ka marjin boht hota hai. Character me utar charhao ane ki waja se aap ke pas boht kuch karne ki gunjaish hoti hai magar mere perstaron ne mujhe negative roles me kuch khas pasand nahi kya phir bhi kabhi kabhar negative role kar leti hon jesa ke pichle dino drama serial Ijazat, me aesa hi ek character kya tha or pehle ki nasbat is bar mujhe boht acha response mila.

Question: haqiqi zindagi me soch ka andaz kya hai, har bat ka negative pehlo dekhti ho ya positive pr zyada tawaja hoti hai?

Sadia: main samjhti hon k insan jesa sochta hai use wesa hi milta hai. Amal ka daro madar niyat pr hai agar aap achi bat sochen ge to natija bhi acha hi hoga lehaza main hamesha positive andaz me sochti hon or har bat ke positive pehlo ko dekhti hon or is bat pr bhi yakin rakhti hon k agar aap ke andar ya aas pas negative pehlo mojud hai to aap apne positive rawaiye se use khtam kar sakte hain. Achai or burai ki jang to hamesha se jari hai magar jeet hamesha achai ki hoti hai.

Question: mutala se dilchaspi hai?

Sadia: kisi zamane me parhne ka boht shok tha magar ab waqt hi nahi milta, akhbar ki surkhiyan parh lon to yahi ganimat jo thora boht waqt milta hai wo computer ki nazar ho jati hai.

Question: tum ne adakari ke elawa hidayatkari bhi ki hai, is ka khyal kese aya?

Sadia: is ka credit kazim pasha sahab ko don gi, mujhe hidayatkari ka shok tha magar himmat nahi ho rahi thi. Kazim sahab ne meri himmat barhai or boht rehnumai ki in ke israr or zor dene pr main ne hidayat kari shuro ki. Pehli serial Tapish ko behad pazirai mili is ke elawa bari behan aliya imam ne bhi boht support kya or har mumkin sath dya, meri kamyabi me in do shakhsiyat ka boht hisa hai.

Question: adakari ki nisbat hidayatkari mushkil lagi?

Sadia: ye dono hi kaam mushkil hain fark sirf itna hai k hidayatkari me zyada zimedari hoti hai, adakari me aap ko sirf apni performance ki fikar hoti hai jab k bator hidayatkar aap ko puri cast ki performance dekhni parti hai. Is lehaz se agar dono ka mowazna kya jae to hidayatkari me zimedariyon ki waja se mushkilat zyada hai.

Question: kya inhin mushkilat ki waja se hidayatkari ko jari na rakha?

Sadia: asal me bat ye hai k agar aap koi boht zimedari wala kaam kar rahe hain to is ke lye kafi waqt chahye mere pas itna sara waqt nahi hota is lye main ise baqaida tor pr jari na rakh saki. Tapish ke bad main ne apni behan aliya imam ke sath ek soap kya tha ab phir planning kar rahi hon q k recording se pehle pura script or mukamal paper work karna zarori samjhti hon or is ke lye boht sa waqt chahye lehaza jese hi mujhe waqt mila to apna project zaror shuro karon gi.

Question: tum ne comedy bhi ki, is ka shok tha ya kisi ke kehne pr is tarha ke role kye?

Sadia: asal me kuch mukhtalif karna chahti thi q k rone dhone wale kirdar boht kar lye the is lye light mod me ane ki koshish ki magar shayad main in kirdaron ke lye munasib nahi thi or logon ne mujhe kuch khas pasand nahi kya.

Question: PTV ke dramen karne ke lye ab sochna parta hai ya khushi se kar leti ho?

Sadia: PTV mera mohsin hai usi ne mujhe pehla moka dya or pehchan karai, main use kese bhul sakti hon wo hamesha se meri pehli tarjih raha hai or ainda bhi rahe ga.

Question: boht se fankar ab PTV pr kaam karna pasand nahi karte un ka khyal hai k wahan se boht kam moawza milta hai?

Sadia: jo aesa sochte hain wo galti pr hai, main samjhti hon k fankar ke lye paise se zyada aham un ki pehchan hai jo aaj bhi sirf  PTV pr kaam kar ke hi milti hai. Private sector se to wo paisa kama hi rahe hain agar is ke sath sath wo PTV ko bhi thora sa waqt de dya karen to is me un ka apna faida hai q k PTV ke drame pure mulk me dekhe jate hain or is ke zarye un ki shohrat dor daraz elako tak pohnch sakti hai.

Question: hamare yahan aksar fankar, adakari ke elawa hidayatkari or drama nigari bhi shuro kar chuke hain, kya tum bhi apne dramon ke script khud likhti ho?

Sadia: drama nigari bhi adakari ki tarha ek qudrati slahiyat hai. Kalam uthana bari bat nahi magar us ki nok se nikle hue alfaz dimag ki takhlik hote hain or ye sirf wahi kar sakta hai jis ke pas qudrati slahiyat ho, main adakari kar sakti hon magar likh nahi sakti isi tarha ek writer likh sakta hai lekin wo adakari nahi kar sakta. Boht kam log all rounder hote hain, han itna zaror hai k apne writer ke sath bethti hon script parhti hon or us pr discus karti hon, use mashware or tajavise deti hon or apni soch ke mutabik us me tabdiliyan bhi karwati hon magar is ka matlab ye nahi k main writer ban gai, wo jo kehte hain na jis ka kaam usi ko sanjhe to main isi ki qail hon.

Question: shadi ke bare me kya soch hai?

Sadia: jab bhi koi acha sathi mil gya to shadi zaror karon gi ye to qudrat ke faisle hain sirf itna chahti hon k ek talim yafta mukhlis or muhabat karne wala sathi mile.